თბილისის ბაროკო ფესტივალი

სიტყვა ბაროკო (Baroque) ფრანგ. - უსწორმასწორო მარგალიტს ნიშნავს. ეს სტილი დაახლოებით 1600 – იან წლებში ჩაისახა სკულპტურაში, ფერწერაში, ლიტერატურასა თუ მუსიკაში და მთელ ევროპას მოედო. მიმდინარეობა მიისწრაფვოდა ხელოვნების სიდიადისა და მისი უფრო ეფექტური, არასაყოფაცხოვრებო ფორმებისკენ. ამ ფენომენის ფორმირებაზე მსოფლიო კულტურის მრავალმა პლასტმა იქონია გავლენა. ევროპაში უკვე ათწლეულებია დიდი პოპულარობით სარგებლობს ძველი მუსიკის მაქსიმალურად მიახლოვებული მანერითა და შესაბამისი ინსტრუმენტებით (ავთენტური) შესრულება. გარდა ესთეტიკური და ეგზოტიკური დატვირთვისა, ასეთი პერფორმანსები ისტორიული კუთხითაც საინტერესოა, მაგლითად, სხვადასხვა ქვეყნის კომპოზიტორთა მუსიკალური ხერხები და თავისებურებები, ასევე გასაოცარია რეპერტუარის სიუხვე და მრავალფეროვნება. თბილისის სახელმწიფო კამერულმა ორკესტრმა "საქართველოს სინფონიეტამ" კულტურისა და ძეგლთა დაცვის სამინისტროს მხარდაჭერით 2015 წელს "თბილისის ბაროკო ფესტივალი" დააფუძნა. „საქართველოს სინფონიეტა“ ძველი მუსიკის ერთადერთი აკადემიური ანსამბლია რეგიონში, რომელსაც უკვე არაერთხელ მიუპყრია მსოფლიოს საუკეთესო საკონცერტო დარბაზების ყურადღება. 2017 წლის 7 ნოემბრიდან 7 დეკემბრის ჩათვლით რიგით მესამე ფესტივალი შედგება და რუსთაველის თეატრის მცირე დარბაზში 7 კონცერტი გაიმართება. ფესტივალზე მსოფლიოში აღიარებული ქართველი და უცხოელი ვარსკვლავები წარსდგებიან მსმენელის წინაშე: „ბერლინის ძველი მუსიკის აკადემია“, ანჩისხატის მგალობელთა გუნდი, ქათევან ქემოკლიძე (მეცო სოპრანო), სალომე ჯიქია (სოპრანო), ანა ცარციძე (სოპრანო), სერგეი მალოვი (ვიოლინო/ ჩელო და სპალა); ჟან რონდო (კლავესინი, საფრანგეთი), დავიდე ამადიო (ჩელო, იტალია), სერჯიო აზოლინი (ფაგოტი, იტალია), ჯოვანი დე ანჯელი (ჰობოი, იტალია) და სხვა. მათი მეშვეობით თბილისში ევროპული კულტურის ბგერითი მუზეუმი გადაიშლება.

www.Sinfonietta.ge ბილეთის შეძენა